БОЛАШАҚ ИНФОРМАТИКА МҰҒАЛІМДЕРІНІҢ КРЕАТИВТІЛІГІН АРТТЫРУДАҒЫ ГЕНЕРАТИВТІ ЖАСАНДЫ ИНТЕЛЛЕКТ ТЕХНОЛОГИЯЛАРЫНЫҢ РӨЛІ

Аңдатпа

Бұл мақала болашақ информатика мұғалімдерінің кәсіби креативтілігін дамытудағы генеративті жасанды интеллект (ЖИ) технологияларының рөлін зерттейді. Зерттеудің мақсаты – генеративті жасанды интеллект құралдарын қолдану арқылы болашақ информатика мұғалімдерінің кәсіби креативтілігін дамыту мүмкіндіктерін анықтау. Зерттеу барысында ChatGPT, Copilot, DALL·E және Midjourney сияқты генеративті ЖИ құралдары пайдаланылды. Эмпирикалық зерттеуге информатика бағдарламасының үшінші және төртінші курстарының 75 білім алушысы қатысты. Зерттеу әдістеріне сауалнама, педагогикалық эксперимент, салыстырмалы талдау және сипаттамалық статистика кірді.

Зерттеу нәтижелері білім алушылардың оқу процесінде генеративті ЖИ құралдарын белсенді түрде қолданатынын көрсетті: қатысушылардың 68%-ы тапсырмаларды орындау кезінде осы құралдарды қолданатыны белгілі болды, ал 70%-ы жаңа идеяларды тудыру қабілеттерін жақсартқанын атап өтті. Сонымен қатар, білім алушылардың 65%-ы шығармашылық ойлау қабілетінің, 60%-ы есептерді шешу қабілетінің жоғарылағанын көрсетті. Эксперименттік тапсырмалардың нәтижелері генеративті ЖИ құралдарын пайдалану сабақ жоспарын құруда, бағдарламалық тапсырмаларды шешуде және көрнекі оқу материалдарын жасауда білім алушылардың шығармашылық қабілеттерін арттыратынын көрсетті.

Зерттеу нәтижелері болашақ информатика мұғалімдерін дайындау жүйесіне генеративті ЖИ технологияларын енгізу олардың кәсіби креативтілігін дамытудың тиімді педагогикалық құралы бола алатынын көрсетеді.