Журнал саясаты

«Батыс Қазақстан инновациялық-технологиялық университетінің Хабаршысы» ғылыми-әдістемелік журналының (бұдан әрі - журнал) редакциялық саясаты ақпараттық ашықтық, ғылыми және авторлық жарияланымдардың қолжетімділігі қағидаттарына негізделеді.

Ғылыми-әдістемелік журнал қазақстандық ғылыми басылым және гуманитарлық ғылымдар, инжиниринг және технология саласындағы іргелі және қолданбалы зерттеулердің өзекті мәселелерін талқылауға арналған ашық пікірталас алаңы болып табылады.

Журнал ғылыми қызметкерлерге, ЖОО, колледж және мектеп оқытушыларына, өндіріс мамандарына, докторанттарға, магистранттарға арналған.

Журнал Қазақстан Республикасы Ақпарат және коммуникациялар министрлігінде 07.12.2017 ж. - №16782-Ж нөмірімен және халықаралық әлемдік мерзімді басылымдар орталығында - ISSN – 2706-6266 нөмірімен тіркелді.

Басылымның құрылтайшысы "Батыс Қазақстан инновациялық-технологиялық университеті" ЖЖКБМ болып табылады.

Журналдың мақсаттары мен міндеттері:

Университет журналының мақсаты ғылымның әртүрлі салаларындағы іргелі және қолданбалы ғылыми зерттеулердің нәтижелерін көрсететін материалдарды жариялау болып табылады.  

Негізгі міндеттер

• университеттің профессор-оқытушылар құрамының, ғылыми қызметкерлерінің, докторанттарының, магистранттары мен студенттерінің, сондай-ақ Қазақстанның, жақын және алыс шет елдердің басқа да университеттерінің, ЖОО-ларының, ғылыми ұйымдарының ғылыми-зерттеу қызметінің нәтижелері мен жетістіктерін жан-жақты жариялау және насихаттау;
• ғылыми зерттеулердің сапасын арттыруды қамтамасыз ететін ашық ғылыми пікір алмасуды қолдау.

Журналдың тақырыптық бағыттары:

• Тарих ғылымдары
• Филология ғылымдары
• Техникалық ғылымдар

Шығу жиілігі

Журнал тоқсан сайын шығады, мақалалар қазақ, орыс және ағылшын тілдерінде толық мәтінді форматта жарияланады.

Қолжазбаны жариялау шарттары

Ғылыми мақаланың қолжазбасын автор журналдың редакциясына хат-хабар үшін ұсынады (қолжазбаның авторлық ұжымы арасынан 2 және одан да көп тең авторлар болған кезде айқындалған).

Авторлар редакцияға бұрын басқа басылымдарда (баспа, электронды және басқа да ашық көздерде) жарияланбаған түпнұсқа жұмысты тапсыруы керек. Авторлар зерттеу нәтижелерінің сенімділігі, жаңалығы, дәлелділігі үшін жауап береді. Редакция алқасы мен «Батыс Қазақстан инновациялық-технологиялық университетінің хабаршысы» журналының рецензенттері қолжазбаны қарау сатысында, сондай-ақ ол жарияланғаннан кейін авторлар бұл қолжазбаны басқа басылымда жариялауға қарау үшін ұсынбауға міндеттенеді.

Редакцияға ұсынылатын мақала журналдың тақырыптық бағытына, авторлардың қолжазбаларды ұсыну ережелеріне сәйкес келуі және ашық сипатта болуы тиіс. Шектеу грифінің болуы материалдың ашық жарияланымға қабылданбауына негіз болады.

Ережелерді бұза отырып пішімделген немесе грамматикалық және орфографиялық қателері көп, автоматты түрде ағылшын тіліне аударылған мақалалар редакцияға қабылданбайды және авторларға қараусыз қайтарылады.

Қолжазбаны электронды платформа (Open Journal Systems (OJS)) арқылы автор мақаланың барлық метадеректерін және оның авторларын көрсете отырып, хат алмасу үшін жүктеуі керек. Журналдың бір санында автор бірлескен авторлықты қоса алғанда, бір мақаладан артық жариялай алмайды. Бір мақала авторларының саны 4 адамнан аспауы керек.

Қолжазбамен жұмыс істеу сатысында редакция, хат-хабар үшін автор және рецензенттер арасындағы байланыс OJS (https://ojs.wkitu.kz/) электрондық (онлайн) платформасы арқылы, ал ерекше жағдайларда – vestnik@wkitu.kz электрондық поштасы арқылы жүзеге асырылады.

Журнал редакциясы қолжазба авторынан/авторларынан келіп түскен қолжазбаның қойылған талаптарға (ресімдеу, плагиатқа қарсы және т.б.) сәйкестігін тексеру мақсатында оны қарайды, рецензиялауды ұйымдастырады және редакциялық алқа қолжазба электрондық платформа арқылы келіп түскен күннен бастап екі ай ішінде жариялау немесе жариялаудан бас тарту туралы шешім қабылдайды.

Журналда жариялауға мақұлданған қолжазбаның авторы (лары) "Батыс Қазақстан инновациялық-технологиялық университетінің хабаршысы" ғылыми журналында жарияланғаны үшін бекітілген баға прейскурантына сәйкес жарияланғаны үшін ақы төлеуді жүзеге асыруға міндетті. Жариялау үшін төлем туралы түбіртекті автор *.pdf  форматында  хат-хабар үшін журнал редакциясының электрондық пошта мекенжайына жібереді (vestnik@wkitu.kz).

Журналда жарияланған мақалалар CrossRef дерекқорында тіркеледі және әрбір мақалаға дәйексөзді, сілтемені және электрондық құжаттарға шығуды қамтамасыз ету үшін пайдаланылатын DOI - сандық нысан идентификаторы тағайындалады.

Көшіру және плагиат

Ғылыми журнал редакциясы қолжазбаның формалды талаптарға сәйкестігін қарау барысында (қолжазбаны ресімдеу) көшіру фактілерінің бар-жоғын тексереді (лицензиялы бағдарламалық құрал пайдаланылады). Мәтіннің өзіндік түпнұсқалылығы кем дегенде 75% болуы керек. Түпнұсқалылықтың қажетті пайызын жинамаған мақала авторға тиісті өзгерістер енгізу мақсатында хат-хабарлар үшін және редакциялық алқаға журналдың электрондық платформасы арқылы қарастыруға қолжазбаны қайта жіберу үшін қайтарылады. Екінші тексеруден кейін теріс нәтиже алынған жағдайда, мақала журналда жариялауға жіберілмейді.

Егер авторлар қолжазбаны жазу кезінде басқа зерттеушілердің еңбектерін, мақалаларын, ережелерін немесе дәйексөздері мен мәлімдемелерін пайдаланса, онда міндетті түрде осы ғалымдардың жұмыстарына сілтеме жасап, дәйексөз келтірілген мәтінді тиісті түрде ресімдеуі керек.

Плагиат БҚИТУ ғылыми журналы үшін жариялау этикасының қағидаттарын бұзатын этикалық емес әрекет деп есептеледі және "Батыс Қазақстан инновациялық-технологиялық университетінің Хабаршысы" журналында жариялауға жатпайды деп танылады.

Халықаралық қоғамдастық пен БҚИТУ қабылдаған ғылыми этика қағидаттарын, стандарттары мен нормаларын бұзу фактілері анықталған жағдайда, журналдың редакциялық алқасы "БҚИТУ ғылыми журналына арналған жарияланым этикасына" және жарияланым этикасы комитетінің (СОРЕ) стандарттарына сәйкес әрекет етуге міндеттенеді (http://publicationethics.org).

Рецензиялау

Журнал редакциясы келіп түскен жұмысты ғылым кандидаты, ғылым докторы, философия докторы (PhD) ғылыми дәрежесі бар 2 (екі) ғалымға немесе мақала тақырыбы бойынша неғұрлым жақын ғылыми мамандану бағытына ие мамандарға дербес рецензиялауға жібереді).

Журналда қос "дерексіз", яғни құпия рецензиялау әдісі қолданылады: мақаланың қолжазбасы рецензенттерге журналдың электрондық платформасы арқылы авторлар туралы деректерді көрсетусіз жіберіледі.

Рецензиялау мерзімін жауапты редактор айқындайды, және бұл мерзім материалды рецензенттерге журналдың электрондық платформасы арқылы, ал ерекше жағдайларда – электрондық пошта арқылы (vestnik@wkitu.kz) жіберген күннен бастап 25 күннен аспайды.

Рецензенттер журналдың электронды платформасында рецензия нысанын толтырады және мақаланы бағалау нәтижелерін журнал редакторына жібереді. Рецензия нысаны міндетті болып табылмайды және журналдың редакциялық алқасының шешімі бойынша өзгеруі мүмкін.

Рецензент қолжазба материалдарын қабылдау мен түсіндіруге әсер ететін айқын мүдделер қақтығысы болған кезде рецензия жазудан бас тартуға құқылы.

Рецензенттер қолжазбаның негізгі ғылыми критерийлерге сәйкестігін нақты, объективті және дәлелді бағалауды талап етеді.

Қолжазбаларға жүргізілген рецензиялау редакцияның одан әрі іс-әрекеттеріне дәлелді ұсыныспен аяқталады.

Рецензенттерден қорытындылар алғаннан кейін жауапты редактор мен техникалық редактор рецензенттердің деректерін көрсетпей хат-хабарлар үшін, ескертулерге жауап беру, тиісті өзгерістер енгізу және қолжазбаны электрондық платформа арқылы қайта жіберу мақсатында оларды авторға (авторларға) жібереді. Автор (лар) ескертулерге жауап беруден, қолжазбаға өзгерістер енгізуден және оны журнал редакциясына қайта жіберуден түсіндірусіз бас тарта алады.

Автордан рецензенттердің барлық ескертулеріне жауап алып, қолжазбаға өзгерістер енгізе отырып, оны журнал редакциясына қайта жібергеннен кейін жауапты редактор мен техникалық редактор рецензентке (терге) қайта рецензиялау үшін барлық материалдарды жібереді.

Екі рецензент пен жауапты редактордың оң қорытындыларын алған қолжазба жариялауға қабылдау кезектілігіне сәйкес "Батыс Қазақстан инновациялық-технологиялық университетінің хабаршысы" ғылыми журналында жариялауға ұсынылады. Редакциялық алқа мақұлдаған қолжазбалар журнал шығарылымын қалыптастыру үшін техникалық редакторға беріледі.

Егер рецензенттердің бірі қолжазба бойынша оң, ал екіншісі теріс қорытынды берген жағдайда, қолжазбаны шығарушы редактор қолжазба тақырыбы бойынша маман болып табылатын үшінші рецензентке немесе редакциялық алқа мүшесіне жібереді. Үшінші рецензент немесе редакциялық алқа мүшесі оң қорытынды берген жағдайда, қолжазбаны жариялауды қабылдау/қабылдамау туралы түпкілікті шешімді журналдың шығарушы редакторы қабылдайды.

Екі теріс пікір болған жағдайда қолжазба журналда жарияланбайды. Рецензиялау нәтижелері бойынша қабылданбаған мақалалар материалдарын редакциялық алқа өз мақсаттарында пайдаланбайды. Техникалық редактор авторды (ларды) жариялаудан бас тарту туралы хабардар етіп, оларға рецензенттердің қорытындыларын жібереді.

Журналда жариялауға мақұлданған/мақұлданбаған әрбір мақалаға рецензенттер тарапынан берілген  бағалаудың электрондық нұсқалары редактор рецензия алған сәттен бастап 3 жыл бойы журналдың электрондық платформасында электрондық форматта сақталады.

Архивтеу және қолжетімділік. Журнал зерттеу нәтижелеріне еркін де ашық қолжетімділік жаһандық білім алмасудың нығаюына  ықпал етеді деген қағидатты ұстана отырып, журнал  контентіне тікелей ашық қолжетімділікті қамтамасыз етеді. Журналдың тұрақты мұрағаты журналдың https://ojs.wkitu.kz/ сайтында және РЖЭК Республикалық бірыңғай ақпараттық жүйесінде (www.rmeb.kz) ашық түрде қолжетімді

Сондай-ақ, журнал "Ұлттық мемлекеттік ғылыми-техникалық сараптама орталығы" АҚ-ның (ҰМҒТСО) қазақстандық дәйексөз дерекқорына (ҚазСБ) және РФ РИНЦ (Ресейлік ғылыми дәйексөз индексі)  ДБ-на https://www.elibrary.ru кіреді.

Жариялау этикасы

Журналдың редакциясы халықаралық ғылыми қоғамдастық қабылдаған этикалық нормаларды сақтау үшін және өз жұмысында да, ғылыми жарияланымдар процесінің барлық қатысушыларымен: авторлармен, рецензенттермен, редакторлармен, баспагермен, таратушылармен және оқырмандармен қарым-қатынаста осы нормалардың кез-келген бұзылуын болдырмау үшін қолдан келгеннің бәрін жасайды.

Редакция алқасының мүшелері әдепті емес мінез-құлық, плагиат, өзі-өзіне плагиат, авторлардың шамадан тыс өзінің еңбектеріне сілтеме жасауын, мүдделер қақтығысы белгілері бар мақалаларды жариялануын болдырмауға жауапты. Егер мақаланы жазу кезінде жариялау және/немесе ғылыми этика қағидаттары бұзылған жағдайда, журналдың шығарушы редакторы редакциялық алқа шешімінің негізінде жариялымның авторға(ларға) кері қайтарылуын/басылымнан алып тасталуын (ретракция) қамтамасыз ету керек. Мақалаларды автор (авторлар) немесе журналдың редакциясы кері қайтарып ала алады. 

"Батыс Қазақстан инновациялық-технологиялық университетінің Хабаршысы" журналының редакциялық алқасының мүшелері тағайындалған рецензенттерден басқа, қолжазба жарияланғанға дейін оны қарау үшін қабылданған ақпарат туралы үшінші тұлғаларға жария етпейді. Сондай-ақ, редакция рецензенттер туралы мәліметтерді авторларға және басқа адамдарға жарияламайды.

Автор(лар) қолжазбада көрсетілген зерттеу нәтижелері өзіндік жұмыс болып табылатындығына және плагиатқа тексеру жүйесі арқылы қолжазбаны тексеру процесінде анықталуы мүмкін мәліметтерді рұқсатсыз пайдалану мен плагиат болмайтындығына кепілдік береді.

Бір мақаланы жариялау құны:

• БҚИТУ ПОҚ (жеке тұлға) үшін - жарияланым үшін 2000 (екі мың) теңге;
• Өзге ұйымдардың ПОҚ (жеке тұлға) үшін - жарияланым үшін 4000 (төрт мың) теңге;
• Барлық ұйымдар үшін (заңды тұлға) - жарияланым үшін 6000 (алты мың) теңге;
• Хирш индексі 10-нан асатын жалғыз автор үшін - жариялау ТЕГІН.
• Шетелдік авторлар үшін (ҚР - мен бірлескен авторлықсыз) - жариялау ТЕГІН.