ЖЕРГІЛІКТІ ШИКІЗАТТАРДЫ ПАЙДАЛАНА ОТЫРЫП, КЕУЕКТІ КЕРАМИКАЛЫҚ МАТЕРИАЛДАРДЫ АЛУДЫҢ НЕГІЗДЕРІ

Аңдатпа

Бұл мақалада жергілікті шикізаттарды пайдалана отырып, кеуекті керамикалық материалдар алудың ғылыми негіздері қарастырылады. Зерттеу барысында Батыс Қазақстан облысындағы Тасқала кен орнының кремнийлі жынысы – опоканың минералогиялық және химиялық құрамы талданып, оның құрылыс материалдарын өндіру үшін жарамдылығы дәлелденді. Сонымен қатар, Батыс Қазақстан облысындағы Погодаев кен орнының бентонитті сазының физикалық-химиялық қасиеттері мен иілімділік сипаттамалары зерттелді. Қарағанды облысы Шұбаркөл көмір кен орнының сапалық көрсеткіштері де қарастырылып, энергия үнемдейтін материалдар алу мүмкіндігі көрсетілді. Әдеби шолу барысында кеуекті керамикалық бұйымдарды өндірудің күйіп кететін қоспалар әдісі, көбіктендіру әдісі, газ шығару әдісі және кеуекті толтырғыштарды енгізу әдісі кең таралғаны анықталды. Нәтижелерге сүйене отырып, опока мен бентонит негізіндегі керамика жоғары беріктігімен, төмен жылу өткізгіштігімен және экологиялық тиімділігімен ерекшеленетіні дәлелденді. Бұл зерттеу «Жасыл экономикаға» көшу тұжырымдамасына сәйкес келеді.