ГЕНОТИПКЕ БАЙЛАНЫСТЫ БҰҚАШЫҚТАРДЫҢ БҰЛШЫҚ ЕТ ЖҮЙЕСІНІҢ ДАМУЫ

Аңдатпа

Ұша бұлшықеттерінің даму ерекшеліктерін зерттеу симментал, қара-ала тұқымды бұқашықтарда және олардың I буын будандарында жүргізілді. 18 айлық жасында әртүрлі генотиптегі 3 бұқашыққа бақылау сойысы жасалды: I топ – таза тұқымды симментал тұқымды бұқашықтар; II топ – ½ симментал × ½ қызыл дала будандары; III топ – ½ симментал × ½ қара-ала будандары.

Бұлшықет топтары мен жеке бұлшықеттердің анатомиялық аймақтар бойынша дамуын зерттеу кезінде әдістемелік нұсқауларға сәйкес сол жақ жарты ұша бөлшектелді. Материалды талдауды жеңілдету мақсатында бұлшықеттер олардың буындарды қамтамасыз ету белгілері мен топографиялық орналасуына қарай жалпы қабылданған схема бойынша топтастырылды. Бұлшықеттердің дамуы жеке бұлшықеттер мен бұлшықет топтарының абсолюттік массасы көрсеткіштері бойынша зерттелді.

III топтағы піштірілген бұқашықтардың I және II топтағы құрдастарынан омыртқа бағанасы бұлшықеттерінің жалпы массасы бойынша 217–772 г-ға (1,43–18,30%), иық белдеуі бұлшықеттерінің жалпы массасы бойынша 1,45–0,51 кг-ға (9,78–3,51%), кеуде аяқтарының бұлшықеттері бойынша 231–660 г-ға (14,37–41,04%), жамбас аяқтарының бұлшықеттері бойынша 3,16–1,11 кг-ға (9,78–3,45%) және жалпы жарты ұшадағы есепке алынған барлық бұлшықеттер массасы бойынша 6,62–2,33 кг-ға (9,79–3,44%) артық екендігі анықталды.