ҚАЗАҚСТАН РЕСПУБЛИКАСЫНДА ТҮБІТ ЖҮНДІ ЕШКІ ШАРУАШЫЛЫҒЫН ДАМЫТУДЫҢ МАҢЫЗЫ

Аңдатпа

Мақала Қазақстан Республикасының аграрлық секторында ешкі шаруашылығын дамытудың маңыздылығы мен өзектілігін ашуға арналған. Қазіргі таңда халықты экологиялық таза әрі биологиялық құнды мал шаруашылығы өнімдерімен қамтамасыз ету, сондай-ақ импортқа тәуелділікті төмендету агроөнеркәсіптік кешеннің басым міндеттерінің бірі болып табылады. Осы тұрғыда ешкі шаруашылығы ет, сүт, түбіт және жүн өндірудің перспективалы бағыты ретінде қарастырылады. БҰҰ Азық-түлік және ауыл шаруашылығы ұйымының (FAO) мәліметтеріне сәйкес, ешкілер әлемнің 170-тен астам елінде өсіріледі, ал олардың жалпы саны 1,15 млрд бастан асады. Жыл сайын ешкі басы негізінен сүт және ет бағытындағы тұқымдардың есебінен орта есеппен 6 млн басқа артып отыр. Континенттер бойынша ешкі санының негізгі үлесі Азияға (66,3%) және Африкаға (25,7%) тиесілі, бұл саланың табиғи-климаттық жағдайларға жоғары бейімділігін көрсетеді. Қазақстанда жайылымдық ресурстардың мол қоры ешкі шаруашылығын, әсіресе түбіт жүнді бағытты дамытуға қолайлы алғышарттар қалыптастырады.